Angelababy初戀男友曝光

15歲富家子、14歲baby

這張Baby初戀合照最近在網上曝光。當年只有14歲的Baby素顏示人，一臉稚氣的她鼻頭的痣仍未脫，雙唇豐厚。與Baby面貼面的初戀男友魏世宗似乎非常冧。

20歲的Angelababy楊穎，一出道即被封為「o靚界女神」，唔夠一年紅到去日本發展。

話明係女神自然有裙下之臣，當年14歲在土瓜灣聖母院書院讀中三的Baby，原來已經好多人追。最近有網友公開Baby與同校初戀男友的合照，Baby一臉純情，與四眼仔男友面貼面，兩小無猜非常sweet。據知Baby的初戀男友叫魏世宗，比她高一年級，甚有家底，不過兩人拍拖唔夠一年就分手。

Baby努力避開o靚模是非的同時，卻避不過被中學時期的同學翻舊帳。最近有人在網上公開一張Baby與初戀男友的合照，發放者是Baby的同校同學。Baby在上海出世，中三才由上海來港，就讀土瓜灣的聖母院書院，當時只有14歲的Baby已長得非常標致，不過身形比較瘦削。

男友係富家子

據知情人士透露，Baby第一日返學已引起哄動，「Baby嚟學校面試已經化晒濃妝，仲講唔正廣東話。佢第一日返學都有化妝，有好多男同學話佢好靚，唔止同級，仲有好多師兄追佢，個個男仔行過班房都明佢，冇幾耐連附近其他學校嘅男生都去學校門口等佢，好誇張。」

雖然是新生，但Baby好快就成為校內鋒頭躉，入學不久更與高一級的師兄拍拖。知情人士說：「Baby拍拖咁大件事幾乎全校師生都知，個男仔大佢一年，叫魏世宗，聽聞屋企有家底，佢同Baby拍咗大半年就散咗，其間仲俾人撞到佢哋一齊去大陸旅行㖭！」對於Baby愈大愈靚，這名睇住Baby大的知情人士話：「其實當年Baby未箍牙，已經好索，雖然依家真係靚咗好多，但我就唔覺係人工整囉！」

記者曾走訪Baby的母校聖母院書院，該校的教職員承認Baby是該校的畢業生，但對於Baby在校內的事跡，則不便透露。本周三（22日），Baby經理人Kim回應Baby初戀情人曝光一事：「我唔知嗰個係咪Baby嘅初戀男友，佢讀中學時有好多男女朋友，成日都同同學仔影相。（聽講佢返學都化妝？）女仔貪靚化吓妝都好正常，其他嘢唔回應喇！」


Baby的母校聖母院書院位於土瓜灣馬頭圍盛德街，該校的辦學宗旨以「忠、孝、勤」為校訓，是一間天主教Band3男女校，校風一般。Baby在該校讀至中五畢業。


扮靚參加陸運會
據知Baby在校內成績一般，不過化妝扮靚就好叻。從這張攝於陸運會的照片可以看出，Baby戴咗大眼仔（有色的隱形眼鏡）同埋搽咗手指甲油，真係好貪靚喎！


4歲小可愛
擁有四分一德國血紀的Baby，自小已經眼大大，輪廓分明。


9歲騷長腿
Baby自小愛扮靚，9歲已經着短褲仔騷長腿，天生已經有做潮模條件。


15歲性感厚唇
天生擁有一張厚唇的Baby，被指15歲箍牙時的雙唇似孖潤腸。Baby解釋那時的嘴唇看似較厚，是因為箍牙所致。


16歲Baby fat
加入兼職模特兒行列後，Baby與William因合作拍迪士尼節目一拍即合，當時的Baby塊面肥嘟嘟，明顯仲有baby fat。


17歲標致五官
07年的Baby已經脫胎換骨，為日本潮流雜誌影封面的她，經過化妝改造，成熟得多。